A Cultura do Viño

O cultivo do viño deixou unha profunda pegada no territorio da Denominación de Orixe Rías Baixas e no modo de vida das súas xentes. De tal forma que non se podería entender as súas paisaxes sen os seus viñedos, nin a súa gastronomía e celebracións sen os seus viños. Nin sequera as vivendas, igrexas e monumentos serían o mesmo se non fora polo ancestral cultivo da vide e a tradición vinícola destas terras…

A tradición conta que unha das variedades máis arraigadas nesta Denominación de Orixe, o Albariño, foi traída por uns monxes cistercenses ao mosteiro de Armenteira (Meis) no século XII. O certo é que esta variedade evolucionou e adaptouse tan intensamente a esta zona, que en ningún outro lugar do mundo adquire a calidade que consegue na Denominación de Orixe Rías Baixas. E de igual xeito que o viño se adaptou a esta zona, esta terra adaptouse ao viño… Algunhas das referencias máis significativas podemos atopalas nas súas festas e tradicións, así como na súa gastronomía e patrimonio inmoble. A continuación se presentan algúns exemplos:

Mosteiro de Armenteira (Meis, Pontevedra)

A primeira referencia escrita deste mosteiro remontase ao século XII. Do seu edificio orixinal só conserva a igrexa que plasma a sinxeleza e simboloxía da Orden del Císter, congregación á que pertenceu e da que forman parte as monxas que o habitan actualmente. Este mosteiro está vinculado a diversas lendas, sendo considerado como o berce do viño Albariño, xa que a tradición conta que os monxes que o habitaron foron os que trouxeron esta variedade de uva ás Rías Baixas. Ademais está relacionado con diversas figuras ilustres da literatura galega como son Alfonso X o Sabio ou Valle-Inclán. O primeiro recolle nas súas Cantigas de Santa María o milagre do abade Ero, e o segundo o utiliza como inspiración para “Aromas de leyenda”. Web: www.monasteriodearmenteira.org

Festa do Albariño (Cambados)

Festa de Interese Turístico Nacional que se celebra na localidade de Cambados a primeira fin de semana de Agosto, e na que se exalta o viño elaborado coa uva Albariña. A súa orixe se remonta ao ano 1953, sendo unha das pioneiras a nivel nacional. Nace como consecuencia da reunión de amigos que deciden disputar cal deles consigue elaborar o mellor Albariño. Na actualidade é unha das citas gastronómicas máis populares e arraigadas de Galicia, na que ademais da degustación dos viños da Denominación de Orixe Rías Baixas nas casetas que se instalan ao longo do Paseo da Calzada, tamén existe unha gran variedade de actividades culturais e de ocio.